काही दिवसांपूर्वी आमच्या कंपनीत लीडरशिप ट्रेनिंग देण्यासाठी निवृत्त मेजर जनरल नीरज बाली सर आले होते. त्यांचं ट्रेनिंग संपल्यावर मी त्यांना प्रश्न विचारला की लीडरशिप चे ऍट्रिब्युटस जे त्यांनी सांगितले ते प्रत्येक ट्रेनर, मेंटॉर सांगत असतो. अगदी पुण्यातील कुणी प्रथितयश उद्योजक घ्या, कोच घ्या, किंवा राष्ट्रीय स्तरावर गाजलेला ट्रेनर घ्या किंवा अगदी जागतिक स्तरावरचे सायमन सिनेक किंवा जॉन कॉलिन्स किंवा झिग झिगलर असं कुणालाही ऐकलं तरी लीडरशिप फुलवण्याचे मुद्दे सगळे सारखे असतात.
माझा प्रश्न हा होता की इतके सगळे नावाजलेले गुरु हे सांगत असले तरी ७०% लोकांना त्यावर काम करावंसं वाटत नाही. व्यावसायिक नॉलेज सातत्याने अपग्रेड करणे, निर्णयक्षमता वाढवणे, पक्षपात न करता न्यायिक भावना ठेवणे, नैतिक आणि मानसिक धैर्य असणे, कामाप्रती एकनिष्ठ असणे, समाजाप्रती किंवा एकंदरीत मनुष्य जमातीबद्दल सजग आणि संवेदनशील असणे, विनोदबुद्धी जागृत ठेवणे आणि सगळ्यात मुख्य म्हणजे पराकोटीची स्वयंशिस्तता आणि निष्कलंक चारित्र्य या लीडरच्या क्वालिटी आहेत. जगातल्या यच्चयावत यशस्वी उद्योजकांच्या आयुष्याचा अभ्यास केला तर हे गुण प्रकर्षाने समोर येतात. स्वतःच्या व्यक्तिमत्वाचं अवलोकन करून गुणमापन सातत्याने करणे आणि त्यात सुधारणा करणे हे या यशस्वी लोकांचं वैशिष्ट्य. आणि हे प्रत्येक जण सांगतो. पण लोकांना मात्र या गुणांना आपलेसे करावे वाटत नाही. काय कारणं असावीत?
मेजर जनरल साहेबांनी सांगितलं की जगातल्या बहुसंख्य लोकांचा या थेअरी वर मुळात विश्वासच नाही. आजूबाजूला घडणाऱ्या प्रसिद्धी आणि पैसा मिळवण्याच्या शॉर्टकट कडे लोक आकृष्ट होतात आणि हा जो अवघड मार्ग आहे तो कशासाठी घ्यायचा हा विचार वरील विचारांवर सातत्याने मात करत आला आहे.
त्यांनी दुसरं कारण सांगितलं की लोकांना वाटतं की आपल्याकडे खूप वेळ आहे. कधीतरी शिकू की, इतकी काय घाई आहे. हे एक शाश्वत सत्य आहे की आपण सर्व लक्झरीचा, छानछोकीच्या गोष्टींचा असा आस्वाद घेतो की जणू आपण उद्या मरणार आहोत, आणि ज्या गोष्टींमुळे आपलं व्यक्तिमत्व विकसित होतं त्यावर काम करताना मात्र आपल्याला वाटतं की काय घाई आहे, अख्ख आयुष्य पडलं आहे. काय परफेक्ट सांगितलं त्यांनी "We consume luxury so hurriedly, as if we are going to die tomorrow. And we refrain working on all important things for life as if there are so many years lying ahead."
असो. येणाऱ्या २०२५ आणि नंतरच्या आयुष्यात आपली व्यावसायिकता, उत्पादकता, कौशल्यं यांचा विकास कसा होईल त्यावर साक्षेपी विचार करेल असं आश्वासन नी मेजर जनरल साहेबांना दिलं. त्यांनी मला शुभेच्छा दिल्या त्या मी तुमच्या पर्यंत पोहोचवतो.
नवीन वर्षाच्या हार्दिक शुभेच्छा
