शायनिंग

काल आय आर सी टी सी च्या वेबसाईट वर तिकीट बुक करायला गेलो तर मेसेज झळकला "या महिन्याचा तुमचा सहा तिकिटांचा कोटा संपला आहे"

हे थोर आहे. सेल्स हाच धर्म असलेल्या माझ्यासारखा माणूस हे वाचून येडाच झाला. नशिबाने साथ दिलीय म्हणून आज काल विमान प्रवास परवडतो नाहीतर रेल्वेनेच प्रवास करायचा म्हंटलं तर  आज ही मला महिन्याला किमान दहा तिकिटं काढावी लागतील. मग सहा प्रवासानंतर मी लायनीत उभं राहायचं! हे विचारलं की लागलीच सैनिक.....कारगिल.....तिथे जाऊन उभं रहा... बा ब्ला ब्ला.

की असं आहे, तुम्हाला महिन्यात सहा रेल्वे प्रवास, तीन शिवनेरीने, दोन विमान प्रवास इतकीच परवानगी आहे. त्यापुढे.......पायी चाला की. राष्ट्राबद्दल प्रेमच नाही हो तुम्हाला.

अन ते काय इन्कम सोर्स डिक्लेयर करायची काय पद्धत आहे ते. पंचवीस एक वर्षापूर्वी राष्ट्रीय बँकेमध्ये दहा हजारच्या वर पैसे काढायचे असतील तर स्लिप च्या मागे लिहावं लागायचं की मी हे पैसे कुठे खर्च करणार आहे ते! आमच्या एका मित्राने लिहून दिलं होतं की "आज संध्याकाळी घोड्याची रेस खेळायला जायचं आहे"

म्हणजे उद्या मी इन्कम सोर्स म्हणून "खत्रीच्या लाईन मध्ये मिळाले" तर ही मंडळी मटका बंद करणार नाहीत पण मी खेळलो म्हणून माझ्यावर कारवाई करणार.

मागचं बी जे पी सरकार शायनिंग इंडिया च्या नावाखाली झोपलं. या सरकारच्या शायनिंगने तर आमचे डोळे इतके दिपले आहेत की पुढे नुसता अंधारच दिसतोय.