जिम

जिमला जाण्याची माझी आणि वैभवीची वेळ वेगवेगळी आहे. मी सकाळी सहाला तर मॅडम ८:३० ला जातात. आज सकाळी आम्ही दोघे एकाच वेळी गेलो.

जिममध्ये माझ्या बरोबर संजय नावाचा अजूबा आहे. तो नॉनव्हेज खात नाही, अंडंही खात नाही. एकोणीस वर्ष वय आहे. सणसणीत बॉडी बनवली आहे त्याने. कुठलंही सप्लिमेंट न घेता. आणि तुफान बडबड्या. तो जिममध्ये असला की त्याची टकळी सतत चालू असते. मला कधी अंकल म्हणतो, कधी सर, कधी दोस्त पण.

आज त्याची वैभवीबरोबर ओळख करून दिली. नंतर तिघे आपापल्या ट्रेनर बरोबर वजनाला जुंपलो.

थोड्या वेळाने संजय माझ्या जवळ आला अन म्हणाला

"वो मॅडम आपकी वाईफ ही है ना!"

मी चमकून त्याच्या कडे बघितलं आणि म्हणालो "ऑफ कोर्स. आपको क्या लगा"

तर तो म्हणाला "नही, मुझे लगा, ऐसीही कोई फ्रेंड है क्या!"

त्याच्या बोलण्याचे मी दोन अर्थ काढले

एकतर आम्ही दोघे नवरा बायको हे एखाद्या मित्र मैत्रिणीसारखे दिसतो. हा फारच अगदी आदर्शवादी स्वप्नाळू विचार झाला.

किंवा मी वयाच्या पन्नाशीत मैत्रीण गाठू वगैरे शकतो हा संजयचा अफलातून ओव्हर कॉन्फिडन्स आहे.

(हा दुसरा अर्थ पचायला अवघड आहे पण त्याने मनाला गुदगुल्या झाल्या हे अत्यंत नम्रपणे नमूद करण्याचा मोह आवरत नाही आहे.)